خايف تكتب سياسة .. طب تعالى

كتير قالولنا خلوا بالكوا من كلامكوا في المنتدى السياسي
بلاش تتعرض لاسماء كبيرة في البلد لتروح مش ورى الشمس .. لأ جوة الشمس !!
لكن قلت في نفسي ليه ما نقولش اللي نفسنا فيه
وفي نفس الوقت ما نتعرض لأي مشاكل مع أي حد من إخوانا اللي ما يتسموش
وكفاية إن فيه قانون في البلد
يحبس اللي يقول إن نتياهو حمار حصاوي وسفاح
لكن طبعآ هكون أذكى ومش هقول كدة ..
لأننا ببساطة مش هنبطل كتابة بإذن الله
إلا لو هما بطلوا اللي بيعملوه وده مستحيل
فقلت أعمل وصفة لكل مواطن شريف يذاكرها قبل الكتابة وبعدها
أو يدوبها في كوباية حبر ويبلبعه لو مافيش فايدة
1- إبدأ موضوعك بجملة حماري قالي
وكدة هتقع العقوبة على الحمار واللي مش مصدق يستجوبه أو يرفع على الحمار قضية .

2- إنك تقول على المسؤول الفاسد إنه مسؤول في دولة ( داهية )
واللي عايز يتأكد يروح في داهية يسأل .

3- إنك لما تتكلم عن الناس الفاسدين إتكلم عنهم بأسماء كودية تفهمها الناس والأعضاء بس
وفي الحين يخبط الفاسدون دماغهم في الحيط
يعني تتكلم عن الاستاذ ق.أ ملك الخوازيق ونفوذه في البلد
أو تنتقد مقالات النفاق بتاعته لحساب جزم الأسياد م.أ .

4- إنك تتكلم عن صفاته فتقول
إن القانون كان طالع عشان يحمي الراجل القصير أبو شعر مسبسب لأنه صاحب الواد
والواد قلبه بيوجعه .. ويلبسها بهاء سلطان .

5- إنك تنقد وتشكك زي ما أنت عايز من غير ما تقول أنت بتقصد مين
وكل واحد ياخد النقد على الجنب اللي يريحه .

6- ضرب المسؤول أهون في العقوية من التشكيك في ذمته وأهو تبقى شفيت غليلك .

7- اكتب زي ما انت عايز وبعدها إعمل أهبل وعبيط ومجنون لو استدعى الأمر
وأهو سرير في الخانكة أحسن كتير من فرشة في هيلتون طرة .

8- إنفي عن المسؤول الفاسد التهم
فتروح الناس مأكداها
فتقول مثلآ إن فلان الفلاني لا هو فاسد ولا حرامي ولا ابن 60 كلب
ومش صح إنهم لقوه قدام باب جامع في ليلة ممطرة .

9- اكتب زي ما انت عايز وبعدين غرقلك عبًارة واهرب على لندن جنب ممدوح موسى .
...
إذا ما فيش ولا حل من الحلول ده نفع معاك
يبقى الحل الوحيد هو الحبل
إشنق نفسك وغور في داهية واخلص .. بلا وجع دماغ

شكرا

» ~ حروف وأشكال لا تكتب بالكيبورد ~
» لكل عشاق سلسة الرجل المستحيل تعالى بسرعه